صوره طبق الاصل

طول فتره الكليه واحنا بنصور ورق نزاكر منه... كتير بتكون الصور مش واضحه وفيها حبر زياده لدرجه انك ممكن تكره الماده ومتعرفش تزاكرها ...مع ان اصل الصور دى جميل... واحيانا يحصل العكس ...تكون المكتبه محترمه وتديك نسخه ممتازه تشبه اصل الورق...لكن ابدا مش ممكن مكنه التصوير تديك صوره طبق الاصل حتى لو اجتهدت انها تعمل ده...دايما بيكون فى خط ناقص...هوه ده الفرق بين الاصل والصور لكن فى الغالب احنا بنتعود على الصور وبنعيش معاها لدرجه اننا نحبها اكتر من الاصول فى ناس عندها قصر نظر لازم تقرب اوى من الصور عشان تشوفها على حقيقتها... وفى ناس عندها بعد نظر بتشوف من بعيد كويس ولما بتقرب الصوره بتبهت وبتضييع معالمها... وفى ناس عندها وجهه نظر بتشوف كويس من كل الزوايا وبتعرف تعكس ده لقارىء مدونتها ممكن تعرف حد كويس اوى وتحبه من غير ماتشوفه؟؟؟ بتحصل طيب لما تشوفه ايه بيحصل؟؟؟ حاجه من اتنين اما ان الصوره تطلع احلى من الاصل فتتمنى وقتها الوقت يرجع بيك عشان تفضل محتفظه بالصوره الجميله اللى رسمتهاله فى خيالك قبل ماتشوفه او ان الاصل يكون اجمل ويكمل الصوره اللى فى قلبك عنه الحقيقه انا حصلى انهارده مزيج من الاتنين من كام يوم عرفت ان فى لقاء مدونين يوم التلات فى اسكندريه...لآخر الوقت وانا مش عارفه اروح ولا لاء...احساس انك هتشوف اصحابك اللى عمرك ماشفتهم واللى ممكن اوى ماتشوفهمش تانى موضوع محتاج تفكير...لكن قدرا كان عندى شغل جنب المكان ونزلت بدرى وقابلتهم...اللقاء كان 90% منه بلوجر والباقى ياهوو 360 كنا تلاته بس او تحديدا للانصاف هما كانوا اتنين ونص...انا وهيليوم اتوم وبطوط...بس بطوط يحسب بنص عشان عنده مدونه على بلوج سبوت الوجوه كلها كانت مألوفه مع اننا كنا خليط من بلاد واعمار مختلفه...كل واحد ليه حياته ...فيهم ناس كبيره يمكن عندهم احفاد وفيهم ناس متزوجين وعندهم اولاد.. وفيهم فى كليات واللى خلص وفى بدايه حياته العمليه... والاختلاف ده اكتر حاجه عجبتنى ...اتناقشنا فى قضايا كتير ...الحوارات كانت ممتعه مع انه كان ينقصه بعض التنظيم فى البرنامج لما رجعت افتكرت موقفين الاول كان لبنت المسلمين ... كان نفسنا نتقابل ودايما نتفق والظروف تتلخبط...قالتلى مره ان فى ناس متشابهين ومجودين بعيد عن بعض...كل واحد بيؤدى دوره فى مكانه.. صعب يتقابلوا...ولو اتقابلوا صعب يفضلوا مع بعض... ولو فضلوا مع بعض هيحصل خلل فى الدور اللى بيؤديه كل واحد فى مكانه وقتها قلت مش ممكن انا اكيد هشوفها ... بعدها بدأنا نتكلم فى التلفون لكن سبحان الله الى الان ربنا لم يشأ باللقاء التاني كان لبطوط فى تاج من سنه ونص تقريبا كان فى سؤال مين الناس اللى متوقع تشوفهم او اللى نفسك تشوفهم ...انا كنت من اللى قال عليهم وقتها برده قلت مش ممكن ابدا ده احنا بيننا جبال وبحور... وسبحان الله ربنا قدر اللقاء التدوينه دى جات سريعه كده بس انا منفعله وكان لازم اكتب حاجه كنت مبسوطه اوى انهارده ..الاصول طلعت زى الصور واحلى كمان... لكنى مازالت افضل التعامل المجموعه الجميله دى من خلال مدوناتهم لآنها بتعكس افضل مافيهم فتفضل صورتهم فى انقى شكل قدام عينيا اتمنى اعرف انطباع الناس اللى حضرت عن اليوم انهارده شكرا لكل اللى تعبوا وسافروا من اخر الدنيا عشان يشوفونا سؤال اخير لو ربنا قدرلك الاختيار...هتتعامل مع الاصول ولا الصور؟؟؟
ملحوظه
الصوره دى هيليوم اتوم هى اللى اختارتها... طبعا هى عجبانى جدااا ومش مناسبه لشخصيتى اصلا خالص ...بس طبعا انا حطتها بكامل ارادتى تحت تهديد السلاح من الاخت هيليوم